பைலட் பற்றாக்குறையால் பிப்ரவரி வரை 300 விமானங்களை குறைக்க இண்டிகோவுக்கு DGCA உத்தரவு?

இந்தியாவின் மிகப்பெரிய விமான சேவை நிறுவனமான இண்டிகோ (IndiGo), கடுமையான பைலட் பற்றாக்குறையால் கடும் சிக்கலில் சிக்கியுள்ள நிலையில், அந்த பிரச்சனை தீரும் வரை வரும் பிப்ரவரி மாதம் வரை அதன் விமான சேவைகளின் எண்ணிக்கையை குறைக்க சிவில் விமானப் போக்குவரத்து கட்டுப்பாட்டு அமைப்பு (DGCA) உத்தரவிடலாம் என தகவல்கள் தெரிவிக்கின்றன. இந்த பிரச்சினை காரணமாக, டிசம்பர் மாதம் இதுவரை 5,000-க்கும் மேற்பட்ட விமானங்கள் ரத்து செய்யப்பட்டுள்ளன.

முன்னதாக தினமும் சுமார் 2,300 விமானங்களை இயக்கி வந்த இண்டிகோ, தற்போது குளிர்கால அட்டவணைக்காக தினசரி சுமார் 300 விமானங்களை குறைக்க உத்தரவிடப்படலாம் என அதிகாரிகள் தெரிவித்துள்ளனர். குளிர்கால அட்டவணை என்பது ஒவ்வொரு ஆண்டும் அக்டோபர் இறுதி ஞாயிற்றுக்கிழமை முதல் மார்ச் இறுதி ஞாயிற்றுக்கிழமை வரை நடைமுறையில் இருக்கும்.

இதற்கிடையில், இண்டிகோ விமானங்கள் குறைவதால் ஏற்படும் பயணிகள் தேவையை சமாளிக்க ஏர் இந்தியா மற்றும் பிற விமான நிறுவனங்களுக்கு கூடுதல் விமானங்களை இயக்க மத்திய அரசு உத்தரவிட்டுள்ளது. இந்த விவகாரம் தொடர்பாக, இண்டிகோவின் மூத்த அதிகாரிகளை டிஜிசிஏ திங்கட்கிழமை நேரில் ஆஜராக அழைத்துள்ளது.

3 மாதங்களில் கூடுதல் பைலட்கள்:

தற்போதுள்ள பைலட் எண்ணிக்கையுடன் எத்தனை விமானங்களை இயக்க முடியும் என்பது குறித்த விரிவான திட்ட அறிக்கையை இண்டிகோ சமர்ப்பிக்க வேண்டும் என டிஜிசிஏ உத்தரவிட்டுள்ளது. பைலட் நியமனம், பயிற்சி திறன் மற்றும் பணிநிர்வாக திட்டம் ஆகியவற்றின் அடிப்படையில் அடுத்த நடவடிக்கை எடுக்கப்படும் என அரசு அதிகாரி ஒருவர் தெரிவித்தார்.

அடுத்த வாரம் முதல் வட இந்தியாவில் மூடுபனி அதிகரிக்கும் என்பதால், விமான தாமதங்கள் மேலும் அதிகரிக்கலாம் என்றும் அரசு எச்சரித்துள்ளது.

இண்டிகோ செயற்குழு அதிகாரி ஒருவர் கூறுகையில், முழுமையான விமான சேவைகளை இயங்கச் செய்ய தேவையான பைலட்களின் எண்ணிக்கை இன்னும் மூன்று மாதங்களில் மட்டுமே அதிகரிக்க முடியும் என்றார். கேப்டன் பைலட்களை உருவாக்குவது நீண்டகால பயிற்சியை தேவையாக்கும் சிக்கலான செயல்முறை என்றும் அவர் தெரிவித்தார்.

ஞாயிற்றுக்கிழமை இண்டிகோ 1,650 விமானங்களை இயக்கியுள்ளது. இது சனிக்கிழமையில் இயக்கப்பட்ட 1,578 விமானங்களை விட சிறிய முன்னேற்றமாகும். இதற்கிடையில், கடந்த ஐந்து நாட்களில் ஆயிரக்கணக்கான பயணிகள் விமான நிலையங்களில் சிக்கித் தவித்ததால், நாடு முழுவதும் பெரும் அதிருப்தி எழுந்துள்ளது. பல பயணிகள், இண்டிகோ தங்களை இலக்கிடம் சேர்க்க முறையாக உதவவில்லை என குற்றம் சாட்டினர்.

இந்த குழப்பத்துக்கு புதிய பைலட் ஓய்வு விதிமுறைகளே காரணம் என இண்டிகோ தெரிவித்துள்ளது. விதிமுறைகளால் 2,422 கேப்டன்கள் தேவைப்பட்ட நிலையில், தற்போது 2,357 பேர் மட்டுமே இருப்பதாக அந்த நிறுவனம் விளக்கமளித்துள்ளது.

பைலட் சோர்வை குறைக்க டிஜிசிஏ இரண்டு கட்டமாக புதிய விதிமுறைகளை அமல்படுத்தியது. முதல்கட்டம் ஜூன் மாதத்திலும், இரண்டாம் கட்டம் நவம்பர் 1 முதல் நள்ளிரவு 12 மணி முதல் அதிகாலை 6 மணி வரை தரையிறக்கங்களின் எண்ணிக்கைக்கு கட்டுப்பாடு விதித்தது. விமான நிறுவனங்களின் கோரிக்கையின்பேரில் ஒரு ஆண்டுக்கு தள்ளி வைக்கப்பட்ட இந்த விதி, கடும் எதிர்ப்புகளுக்கிடையே தற்போது அமல்படுத்தப்பட்டுள்ளது.

இதன் தொடர்ச்சியாக, அதிகமாக உயர்ந்த விமான கட்டணங்களுக்கும் டிஜிசிஏ கட்டுப்பாடு விதித்துள்ளது. 500 கி.மீ வரை பயணிக்கும் விமான டிக்கெட் கட்டணம் அதிகபட்சம் ரூ.7,500 மற்றும் 1,000–1,500 கி.மீ தூரத்திற்கு ரூ.15,000-ஐ மீறக் கூடாது என உத்தரவிட்டுள்ளது. ஏர் இந்தியா, ஸ்பைஸ்ஜெட், அகாசா ஏர் போன்ற நிறுவனங்கள் கூடுதல் விமானங்களை இயக்க உத்தரவிடப்பட்டுள்ளன. ஏர் இந்தியா தனது வைட்-பாடி விமானங்களையும் உள்நாட்டு பாதைகளில் இயக்கி வருகிறது.