உத்தரப் பிரதேசத்தில் மருந்து விநியோகத்துக்கான டெல்விவரி VTOL ட்ரோன் வெற்றிகர சோதனை

லாஜிஸ்டிக்ஸ் தொழில்நுட்ப நிறுவனம் டெல்விவரி (Delhivery) தனது தானியங்கி செங்குத்து புறப்பாடு மற்றும் தரையிறக்கம் (VTOL) ட்ரோன் தொழில்நுட்பத்தை உத்தரப் பிரதேச மாநிலம் தேவோரியாவில் வெற்றிகரமாக நேரடி சோதனை செய்து முடித்துள்ளது. இந்த நிகழ்ச்சியில், முன்கூட்டியே நிர்ணயிக்கப்பட்ட 12 கிலோமீட்டர் தூரத்தை, மருந்துகளுடன் கூடிய ட்ரோன் வெறும் 12 நிமிடங்களில் தானியங்கியாக பறந்து சென்றது.

சாலை வசதிகளின் குறைபாடு காரணமாக, இதே பயணம் பொதுவாக 40 நிமிடங்கள் வரை எடுக்கும் நிலையில், இந்த ட்ரோன் சோதனை, இந்தியாவின் கடைசி கட்ட விநியோகத்தில் (Last-Mile Delivery) விமான வழி லாஜிஸ்டிக்ஸ் பெரும் மாற்றத்தை ஏற்படுத்தும் என்பதை வெளிப்படுத்துகிறது என டெல்விவரி நிறுவனம் தெரிவித்துள்ளது.

இந்த நேரடி சோதனை நிகழ்ச்சி, தேவோரியா நாடாளுமன்ற உறுப்பினர் சஷாங்க் மணி அவர்களின் முன்னிலையில் நடைபெற்று, டெல்விவரியின் துணை நிறுவனம் ஆன டெல்விவரி ரோபோடிக்ஸ் இந்தியா பிரைவேட் லிமிடெட் மூலம் செயல்படுத்தப்பட்டது.

இந்த ட்ரோன், டெல்விவரியின் சொந்த தொழில்நுட்பத்தில் உருவாக்கப்பட்ட முன்மாதிரி ட்ரோன் குழுவின் ஒரு பகுதியாகும். கடினமான நிலப்பரப்புகள் மற்றும் மோசமான வானிலை சூழல்களிலும் செயல்படும் வகையில் இது வடிவமைக்கப்பட்டுள்ளது. இந்த VTOL ட்ரோன், ஒரே முறை சார்ஜில் 5 கிலோ வரை சரக்குகளை 60 முதல் 90 கிலோமீட்டர் தூரம் வரை எடுத்துச் செல்லும் திறன் கொண்டது. மேலும், இது செங்குத்தாக புறப்பட்டு நீண்ட தூரம் திறம்பட பறக்கும் ஹைப்ரிட் வடிவமைப்பைக் கொண்டதாகவும் நிறுவனம் தெரிவித்துள்ளது.